Psa 62 | YomNWM | STEP | Nkunga Davidi kuidi Yedutuni, pfumu minyimbidi. Muelꞌama umbakanga luvovomo mu Nzambi kaka. Phulusu ama kuidi niandi yimbanga.

Psalms 62

Muelꞌama widi mu ndembama mu Nzambi

Nkunga Davidi kuidi Yedutuni, pfumu minyimbidi.

1 Muelꞌama umbakanga luvovomo mu Nzambi kaka.
Phulusu ama kuidi niandi yimbanga.
2 Niandi kaka ditadi diama
ayi phulusu ama ;
niandi suamunu kiama kingolo ;
Ndilendi bulangana ko.
3 Nate zithangu zikua lufueti nuanisina mutu e ?
Lutombidi beno boso bu kumbuisila e ?
Banga baka kioki kitengama
banga luphangu lolo lueka bua e ?
4 Balembo nyendila manenga
muingi bankundumuna va buangu kiandi ki zangama ;
khini beti mona mu mambu ma luvunu.
Mu muinu miawu, balembo sakumuna,
vayi mu khati ntima miawu, balembo singi.
5 Ba mu ndembama, a muelꞌama, mu Nzambi kaka !
Diana diama kuidi niandi dimbanga.
6 Niandi kaka ditadi diama ayi phulusu ama ;
niandi suamunu kiama ki ngolo ;
Ndilengi bua ko.
7 Phulusu ama ayi nzitusu ama kuidi Nzambi bidi ;
niandi ditadi diama dingolo, suamunu kiama.
8 Tulanganu diana dieno mu niandi
mu thangu zioso, a batu.
Luyalumuna mintima mieno kuidi niandi
bila Nzambi niandi suamunu kieto.
9 Batu baphamba badi kaka phemo,
batu banneni badi kaka luvunu ;
enati babasidi va basikilu, basi kadi kiasa.
Kubafuba va kimosi, badi kaka phemo.
10 Kadi tulanu diana mu vinza bima bingana ;
voti tula luniemo mu bima bibuivi.
Ka diambu ko kimvuama kiaku kilembo yilama,
kadi tula ntimꞌaku mu biawu.
11 Khumbu mosi Nzambi utuba,
zikhumbu zizole ndiwila :
ti ngeyo, a Nzambi, ngolo widi,
12 ayi ti ngeyo, a Yave, widi kiluzolo.
Bukiedika, wetafuta kadika mutu boso bukasadidi.